@caixasostible chega aos 40 IES galegos que participan no proxecto

Desde o pasado mes de decembro A Caixa Sostible está repartida por toda a xeografía galega. Desde a Fonsagrada, ata Tui, Ferrol, ou Ourense, pasando por Monforte de Lemos, Burela, Carballo, Lalín, O Porriño, A Lama, Rianxo, Santiago de Compostela, Soutomaior, Mondoñedo, Oleiros, Vigo, A Coruña, Cambados, Cee, Sanxenxo, Brión, Mondariz e unha boa listaxe máis, a caixa viaxou ao longo das catro provincias galegas.

Cada centro educativo que participa no proxecto recibiu unha Caixa Sostible que pasou a pertencer ao instituto. En cada centro asignáronse un ou varios docentes responsables do proxecto, que son maiormente profesaras e profesores de asignaturas relacionadas con Ciencias e Tecnoloxía, e que están sendo os encargados e encargadas de poñer en marcha e denvolver as actividades cos alumnos e alumnas dos cursos de 4º da ESO e Bacharelato.

Na caixa, que está dividida en cinco compartimentos: Pegada de Carbono, Eficiencia Enerxética, Eficiencia Luminosa, Calidade das Augas e Patrimonio Xeolóxico, os IES reciben o instrumental e material explicativo preciso para levar a cabo cinco as actividades que están relaciondas coa sustentabilidade e o coñecemento dos recursos da súa contorna.

O alumnado dispón de cinco meses para realizar as actividades, durante os cales conta co soporte e asesoramento dos investigadores da Escola de Enxeñeiros de Minas e Enerxía da Universidade de Vigo que deseñaron as actividades. Ao final destes meses reportarán á Universidade un póster cos resultados máis significativos.

Segundo as fotografías enviadas desde os Centros, a xa famosa caixa foi recibida con moito entusiasmo, tanto polo profesorado como polo alumnado dos corenta IES implicados.